Wafanyabiashara washauriwa kuanzisha viwanda vidogo

WAFANYABIASHARA ndogo mkoani hapa wametakiwa kutumia fursa zilizopo kuanzisha viwanda vidogo vya uzalishaji wa bidhaa badala ya kuwa wachuuzi.

Mkuu wa Mkoa wa Dodoma, Chiku Galawa alitoa rai hiyo jana alipowatembelea wafanyabiashara hao maarufu kama wamachinga, kwenye soko la Rehema Nchimbi Complex lililopo mjini hapa kwa lengo la kukagua mazingira ya kufanyia biashara sokoni hapo.

Galawa alisema biashara ya uchuuzi haiwaletei faida na mafanikio yanayohitajika badala yake inawafaidisha zaidi wazalishaji wenye viwanda, wengi wao kutoka nje ya nchi.

“Lazima mbadili mtazamo na kujikita katika kuanzisha viwanda vidogovidogo ili kuingia katika biashara ya uzalishaji bidhaa na usambazaji wake ambayo itawaletea mafanikio makubwa kiuchumi,” alisema.

Pia aliwataka wamachinga kujitathmini kila mmoja anavutiwa na kufanya uzalishaji wa bidhaa zipi huku wakichambua fursa zinazopatikana mkoani Dodoma.

Alizitaja baadhi ya fursa zilizopo mkoani Dodoma ni pamoja na uwepo wa viwanda vya nyama hivyo kuna nafasi nzuri ya kuanzisha viwanda vidogo vya kutengeneza bidhaa za ngozi kwa kuwa malighafi ya ngozi ya asili ya wanyama itapatikana kwa urahisi kutoka kwenye viwanda hivyo vya nyama.

Aliwahakikishia upatikanaji wa soko la bidhaa zao endapo watajitahidi kutengeneza bidhaa zenye ubora.